logo

شعر محلی روز پدر- خانم رقیه رضاپور آهنگر

روزِ بابا بَهییه دل سَروشتِه
مِه ابرِ چِش مِه دیمِ رو بَروشته
چندِسرده چنده بی سکِّ سوءِ
خِنه ای که بی پِرِ بِکِ بوءِ
سِره بی بابا دار هَسّه بی ریشه
پِرِ داغ دلِ رو دَرِه همیشه
اگر نِماز ستونِ دین بَهییه
خِنه که پِر دَره ستون دَهییه
هَنتا لالی که دل مَشتِ سِروشه
دِنیایِ حرف چالِ مِه دِلِ گوشه
هرسالِ عید اِنگار تازه بَمردی
اَمه خنده خِشالی رِ بَوِردی
یاده بابا؟دَشی من وَچه بیمه
نِنای چادر گوشه رِ کَشیمه
وَچون چِتی شِه بابا رِ دانه خِش
تو مِه یاد اییمی مِه دِل شییه غَش
دِرسته گَت بَهیینه دِل کِچیکه
مِه دِل تَنگِ توءِ بِشکِس وُ تیکه
بابا تِه ساقِ رو مِه سَر رِ وِنه
تو که دَنی مِرِ دِنیا نَوِنه
تِه گرمِ کَشِه جا دلگرم بیمه
تو که دَنی بابا مِن هیچی نییمه
کلاس اول وُ بابا او هِدا
همیشه خسته،خسته تنِ فِدا
کاش اتّا کم تِرِه بیشتِر بدیبوم
تِه کَشِه دَیبوم تِرِه بو کَشیبوم
کاش اَتّا کم تو هم راحِت هَکِردبی
بَیبی حاجی لِباس اِحرام دَکِردبی
تِواسِّ چاووشی صدا بَکِردبو
اَمِه تاریک شوئسّه بی، ماهِ سو
روز بابا همیشه حسرِت هَسّه
تِه سنگِ قبر وُ مِنو دِلِ غِصّه
باخِس بابا،باخِس آروم وُ خارِک
مِه مهربون بابا تِه روز مبارک

فاتحه ای نثار شادی روح همه پدران سفر کرده?

رقیه رضاپور آهنگر

@golbagh1395

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

4  +  2  =